Michel Arhancet

Michel Arhancet 1947an sortu zen Atarratzeko Madalena auzoko Oxoaix etxean. 

Bost haurrideko familia bateko bigarren haurra zen. Lehenik auzoko eskola publikoan ibili zen (1953-1959), ondotik Mauleko Saint-François kolegioan (Seigarrenean Zertifikata erdietsi zuen 1959-1960 ikasturtean) eta gero Berrogaine-Larüntzeko Bixta Eder Laborantza Profesional Formakuntza Zentroan (gaur egungo Xiberoko laborantza lizeo pribatua (LARPS)), hartan Laborantza gaitasun agiria erdietsi zuelarik 1962an. 

Eskolaldia bukatu bezain laster, familiaren etxaldean lanean hasi eta soldadugoa egin zuen 1967-1968an. 1970ean ezkondu zen eta 1973a arte, familiaren etxaldean eta bere emaztearenean (Bagaüla) lanean aritu zen.

1973an Mattin bere anaia Oxoaixian plantatu zelarik, osoki emaztearen etxaldean aritu ahal izan zen (behi eta ardi hazkuntzan).

Beren hiru haurrak 1971, 1974 eta 1976an sortu ziren.

1970 hamarkadako erditsutik goiti, Michel azkarki engaiatu zen ardi esnearen, Pirinioetako bildotsaren eta mendiko laborantzaren alde: Xiberoko ardi sindikataren sortzea (1975), Chaumes esnetegia (1979), ekoizleen sindikata (1981), Axuria kooperatiba (1983), Label Rouge sormarka (1996), Pirinioetako Bildotsaren adierazpen geografiko babestua (IGP) 2012an, etab. 

Etxarriko baserri inguruneko formakuntza elkartearen (AFMR) laguntzarekin, Xiberoko lehen baserrialdeko antolaketa planean parte hartu zuen, bai eta ondoko lurralde hitzarmenetan ere.  

Bestalde, Michel Arhancet-ek Euskal Herriko Laborarien Batasunaren (ELB) sortzean ere parte hartu zuen. 

Azkenik, Atarratzeko kantonamenduko kontseilari orokorra izan zen 1992tik 2011ra (hiru kargualdi).