Beñardo Anchorena

Beñardo Anchorena 1937ko urriaren 26an sortu zen Irabiako (Nafarroa) lakuaren bazterrean, Iratiko oihan mendigunearen oinetan kokatu Xidroinia etxean. Xidroinia Aezkoa ibarreko Orbaizetako lurretan zen. Ezinbesteko jatetxea eta pasabidea zen, hala nola oihaneko egurra moztu eta Aioz aldera eramaten zuten egurgile eta beste langileentzat.

Beñardoren ama bi urte zituelarik hil zen haurra ukaitean. Bederatzigarren haurridea zen eta 6 urtetan, mutiko gaztea osaba eta izebaren etxean ezarri zuten, armak egiten ziren Ola izeneko auzoan. 1960an, haien etxean plantatu zen bildots eta ardi batzuekin, eta bi urte berantago ezkondu zen (1962).

Beste artzain batekin elkartu ondoan, tropa handiagoa lortu ahal izan zuen: bostehun ardi inguru eta berrogei bat zaldi. 1976ra arte, negu guziz alhagietara joaten zen, Aiherrara, Heletara, Iholdira edo Maulera. Gazte-gaztetik, jadanik neguak Irisarri Ospitalean iragaiten zituen bere osabaren ardiak zaintzeko.

1976an, bikoteak Iruñea ondoko Burlata herrian plantatzeko erabakia hartu zuen, beren lau alabek ikasketak jarraitzeko parada ukan dezaten. Bertan, Beñardok denbora berean bi lanbide ukan zituen, horietako bat udaltzain.

2005ean, 65 urtetan erretiroa hartu eta berehala, Orbaizetako Ola auzora bizitzera itzuli zen.
Beñardo Anchorenaren aita eta anaiak Iratiko oihanaren ustiatzen aritu ziren lanean. Lekuko hurbila izanik, jarduera haren etapa ezberdinak, hala nola ateratze eta garraio moduak aipatzen dizkigu.