Sauveur Bacho

Sauveur Bacho 1951ko agorrilaren 17an  sortu zen Donaixtiko Arlakondo auzoko Eihartzea etxaldean. Hiru anaia ditu: Jean-Louis (1948-1979) istripuz zendua, Laurent (1949) eta Dominique (1954).

Bere anaiak bezala, 1957tik 1962ra auzoko eskola publikoan ibili zen. Ondotik bere ikasketak ondoko kolegio-lizeoetan segitu zituen: Donapaleuko Etchecopar kolegioan (1962-1964: 6.a eta 5.a), Mauleko Saint-François kolegioan (1964-1966: 4.a eta 3.a), Hazparneko Saint-Joseph lizeoan (1966-1969: BTA laborantza teknikariaren agiria ukan zuen).

1969ko urriaren 1ean, Lur Berri kooperatiban sartu zen, eta lau zerbitzu ezberdinetan lan egin ondoren, 40 urte geroago baizik ez zuen utzi, hots 2009an. Zerbitzuen arteko mugimendu hori, Sauveur Bachok Frantziako CFDT sindikatuan izan engaiamendu sendoaren ondorioa da.

Halaber, Donapaleuko kantonamendua bizkortzeko 1992an sortu “Avenir du Canton” elkarteko kide biziki aktiboa izan zen. Bestalde, hainbat aldiz kantonamendu hauteskundeetarako hautagai izan zen, bai eta 2011ko senatari bozetarako eta 2014ko Europakoetarako ere.

2001az geroz, Arberatze-Zilhekoa-ko auzapeza da.

1978an Behaskane-Laphizketako Maddi Recalderekin ezkondu zen. Bi seme dituzte: Mattin eta Gilen.