Dominique Garacotche "Murritx"

Dominique Garacotche 1934ko abenduaren 19an sortu zen Ezpeletako Mendikoaga izeneko etxean. Etxea Murritxenea deitu ohi da ere, Dominique-ren arbaso baten izengoitia zela eta. Funtsean, herritar anitzek Dominique Murritx deitzen zuten, Mendikoaga izena nagusiki administrazioak baliatzen duelarik. Lau haurrideko familia bateko bigarrena zen (arreba bat bera baino zaharragoa, beste bat bera baino gazteagoa eta anaia bat gazteagoa ere), eta berak hartu zuen familiaren etxaldearen segida.

Herriko eskola publikoan (1939-1946) eta ondotik Lekorneko Garroa laborantza formakuntza zentroan (1946-1948) ibili zen, baina aitortu duenez, ikasketak ez zituen gustukoak.

Laborantza diploma eskuraturik, bere burasoak lagundu zituen familiaren etxaldean (bere aita 1955ean zendu zen) herriko bizian parte hartzen zuen ber (merkatuan, ferian, patronaiaren aktibitateetan).

Soldadugoa egin ondoan (1955eko urria-1957ko abendua), ofizialki familiaren enpresan plantatu zen 1957an eta Fanny Hiribarren-ekin ezkondu zen 1962an. Lau haur ukan zituzten elkarrekin: André, Maritxu, Thérèse eta Chantal, hurrenez hurren 1963, 1964, 1965 eta 1968an sortuak.

1952tik goiti eta Europako merkatu bateratua indarrean sartu arte, Dominique kontrabandan aritu zen, laborantza bidezko etekinen osagarri bezala. Erretiroa 1992an hartu zuen, 58 urtetan.

Dominique Garacotche 2022ko urtarrilean zendu zen.