Johañe edo Jean Urhe, Quihillaber deitua, 1934an sortu zen Larraineko Ekibegi Handia auzoko Quihillaberria etxaldean. Ama, Marie-Louise edo Mailuisa Elichiry, etxe berekoa zen, eta aita, Joseph edo Jüje Urhe, Larraineko Zelai etxekoa. Johañek anaia gazteago bat badu. Herriko eskolan ibili zen, eta gero Zertifikata Atharratzen eskuratu zuen. Familiako etxaldeak zazpi hektarea lur bazituen eta azienda ere. Johañe mendira joaten zen, Maltako olhara, ardien zaintzera. Bere familia ihizian ibiltzen zen (baimenik gabekoan ere): usoak, basurdeak, lepazuriak, azeriak eta beste. 1953ko Larraineko pastorala kari, Johañek Zuberoako dantzak ikasi zituen aitarekin; dantzaren inguruan luzaz segitu zuen gero, lehiaketak irabaziz eta klaseak emanez. 1955ean soldadugoa egin eta Aljeriako gerlara deitu zuten; handik 1957an edo 1958an itzuli zen. Hogeita zortzi urte bete arte, hainbat lanbidetan aritu zen etxaldeko lanetan laguntzen zuen bitartean. Azkenean, Posta, Telegrafo eta Telefonoetako (PTT) lehiaketa gainditu eta Parisera bizitzera joan zen. Han ere dantzan segitu zuen, Pariseko zuberotar dantzarien taldearekin. Johañe Maiteja Althabe Phordoy-rekin ezkondu zen, eta hiru seme-alaba izan zituzten. 1976an, bikoteak Angeluko Hardoi auzoan hartu zuen etxea. Johañek Zuberoako dantza-eskolak eman zituen Hardoiko adiskideen elkartean, eta 1980an sortu Hardoytarrak euskal pilota elkartean ere buru-belarri aritu zen.
