Josefina edo Joséphine Irazoqui 1933ko azaroaren 13an sortu zen Oleta auzoko Manttu Baita etxean. Aita, Xalbador Irazoqui, Lesakakoa zen, eta ama, Maria Irazoqui, Berakoa. Biak Manttu Baita baserrira etorri ziren bizitzera, eta laborantzatik bizi izan dira. Josefina bederatzi haurrideko familiako zaharrena zen. Manttu Baita baserria Ziburu Mendi-ren magalean kokatzen da, mugatik biziki hurbil; Urruñako erdigunea zazpi kilometrotan du, eta Azkainekoa lau kilometrotan. Josefina Oletako eskola publikoan ibili zen, eta gero etxeko laguntzaile izateko formakuntza egin zuen Milafrangan. Hogei urte inguru zituelarik, bizia erlisioneari eskaintzea erabaki zuen: serora egin zen eta Angeluko Bernardinen komentura joan zen bizitzera. Bernardinak kongregazio kontenplatiboa da: isiltasun botoa egiten dute eta bizia otoitzari eskaintzen diote. Josefinak biziaren zatirik handiena komentuan eman zuen. 2020an, laurogeita zazpi urtetan, serora anitz aterpetzen dituen ondoko Mariama zahar egoitzan gela bat hartu zuen.
