Pierre Rousseu, Latxikana izenez ezaguna, 1941eko martxoaren 14an sortu zen Eskiulako Barrena auzoko Latxikana etxean. Aita, Eskiulako Arruseua etxekoa, Latxikana baserrira ezkondu zen Kattalina Aguer-ekin. Pierre bost haurrideko laugarrena zen. Eskiulako eskolan ibili zen Zertifikata lortu arte, eta ondotik, hiru urteko laborantza formakuntza segitu zuen. Eskiulako irakasleak, Orbiscay-k, xiberotar kantuak eta dantzak irakasten zizkieten. Anaia zaharrenak, Jean-Pierrek, familiako etxaldearen segida hartu zuen. Pierrek familiako etxaldean lan egin zuen soldadugora joan aitzin (oinarrizko formakuntza Carcasonan eta hemeretzi hilabete Aljerian). 1962an, PTT-etan hasi zen lanean, telefono zerbitzuan, Parise inguruko Val-d’Oise departamenduan. 1976an Baionara lekualdatzea lortu eta berriz Euskal Herrira etorri zen bizitzera, Angelura hain zuzen. Pierre dantzan aritu zen bai Eskiulan, bai Parisen. Horrela, 1964an Pariseko Euskaldunek antolatutako "Matalas" pastoralean “satan” izan zen. Halaber, 1967an Parisen jokatu zen "Etxahun koblakari" pastoraleko “süjeta” izan zen. Parisen, Altzürüküko Maddalen Jaragoyhen Etchart-ekin batera, Xiberoko dantzak irakatsi zituen. Halaber, Xiberoko lagunekin maiz elkartzen zen Parisen, Dominika Etchart Larraki-ren inguruan, kantatzeko. 1969an hasi zen kantuak sortzen: berrogeita hamar inguru egin ditu. Hasieran Pariseko Euskaldunek kantatzen zituzten (1973an disko bat argitaratu zen hamahiru kanturekin), eta gero Zuberoan hedatu ziren. Kantuak belarriz sortzen ditu. 1992an, Xiberoko Zohardiak Pierre-ren berrogei kantu bildu zituen liburu batean. 2012an, omenaldi bat egin zioten, Xiberoko Zohardiak urtero antolatzen duen “Xiberoa Kantüz” ekitaldiaren karietara. Pierrek Parisen ezagutu zuen bere emaztea, Mitikileko Agnès Aranthabe, eta bi haur izan zituzten.
