Margitta Mathieu

Margitta Mathieu Garruzeko Bidartia izeneko etxean sortu zen 1944ko otsailaren 27an. Bost haurrideko familia bateko laugarrena zen (aita alargundu eta koinatarekin berriz ezkondu zen: azken lauak bigarren ezkontzatik sortu ziren). Margitta Garruzeko eskola publikoan ibili zen (1948-1955), Jeanne d’Arc kolegioan (1955-1959), bai eta Uztaritzeko San Josep eta Baionako Villa Pia lizeoetan (1959-1963) ere, batxilergoa azken horretan lortu zuelarik.

Xiberotar serora baten hitzek liluratuta, Lyon-eko Seroren misio baten karietara Boli Kostako Zuénoula-ra joan zen (1963-1965), eta hango egonaldia irakasle gisa luzatu zuen: lehenik Yamassoukro-ko nesken lizeoan (1965-1967) eta gero Abidjan hiri inguruko kolegio publiko batean (1967-1969).

Herrira itzulita, lehenik Letra Modernoetako lizentzia bat eta ondotik “Frantsesa Atzerriko Hizkuntza gisa” lizentzia egin zuen Sorbonan. Gero, klaseak eman zituen Parise eskualdean, lehenik Bagneux-en (Hauts-de-Seine, 1969-1970) eta ondotik, Clamart-en (1971-1989). Ondoren, Bordele inguruan aritu zen (Floirac, 1989-1991), eta gero Euskal Herrira itzuli zen (Donapaleuko Léon Bérard kolegioan, 1991-2003).

Pariseko egonaldi luzean (1969-1989), 1974an euskara ikasten hasi zen, lehenik bakarrik eta gero Mende Berri elkarteak antolatu ikastaldien bidez. 1990 urteetan Garruzen behin betiko finkatu zelarik, hainbat elkartetan engaiatu zen, hala nola Zabalik-en (euskararen eta euskal kulturaren garapena). Han, Manex Erdozaintzi-Etxart fondoa (4535 dokumentu) numerizatu eta jendeentzat eskuragarri jarri zuen. 2009tik aitzina bereziki, Lehengo Garruze elkartean sartu zen (Garruzeko historia eta ondarea).