Maddi Inchauspé

Maddi Elhorry, ezkondu ondoan Maddi Inchauspe, 1921eko urtarrilaren 19an sortu zen Donaixtiko Dominikategia etxean. Hor bizi izan da 1948an ezkondu zen arte.

Bere aita, eiherazain semea zen (Dominikategia etxeko lehen auzoak), eta ikazkin lanetan ari zen.

Bere haurtzaro eta gaztaroan, Maddik ikatza oihanetik ateratzen eta saltzen laguntzen zuen.

Hamabi urte zituenetik, uso ihiziaren garaian, Oskaxeko lepora joaten zen, aitaren kusi baten laguntzera, harek ihiztarientzat ostatu ttipi bat irekitzea erabaki baitzuen.

Hamabost urte zituelarik (1936an), leku hartako jabearen semea ezagutu zuen. Gerla bukatu ondoan baizik ez ziren ezkondu. Elkarrekin, ostatuari gaur egun ezagutzen diogun itxura eman zioten (jangela bat eraiki, ganbarak antolatu…). Beren hiru alabetako batek beren ildotik segitu zuen, hotel-jatetxea etengabe hobetuz. Ostatua bere gastronomia, ikuspegia eta uso ihizi famatuagatik ezaguna da.

Maddiren senarra 2001ean zendu zen.

Maddi bera, 2013an zendu zen, 92 urterekin.